節日限定套餐
有留意開抹茶嘅吃貨朋友仔，都知中村藤吉殺入香港之後，喺金鐘太古廣場開過Pop-up store，來到12月中，中村藤吉終於正式喺金鐘開舖，長駐PP！全新分店新開張，當然要賣新野啦，就算新舖未開，另外兩間中村藤吉，一樣有聖誕禮盒同期間限定節日套餐。
中村藤吉聖誕禮盒Set A(木盒裝)
先講金鐘舖，基本抹茶野好似係現泡日本茶、抹茶/焙茶軟雪糕等等同樣喺度，而家連個雪糕窩夫筒，都可以畀你揀埋抹茶/焙茶口味，配襯自選配料，包括白玉丸子、紅豆蓉、脆脆玄米、茶啫喱、即磨抹茶粉、特濃朱古力，同埋軟雪糕口味可選抹茶、焙茶或抹茶加焙茶混合口味，全程都係自己配！
抹茶軟雪糕配抹茶窩夫筒
扭紋軟雪糕配焙茶窩夫筒
焙茶軟雪糕配抹茶窩夫筒
另外金鐘新店獨有嘅全新食品，分別有抹茶啫喱外賣杯（加配日本東京銀座分店限定嘅抹茶蓉）；第一次推出同宇治本店同步發售嘅玉露啫喱；同埋兩款茶香飯糰，兩款口味包括「梅子昆布碾茶」同「藤吉煎茶山椒魚乾」，邊個話去中村藤吉剩係飲茶同食甜品？
藤吉煎茶山椒魚乾飯糰及梅子昆布碾茶飯糰
最後提提你，新舖未開住要等多等，但係中村藤吉準備咗好多款精選聖誕禮盒同元旦福袋，全線分店發售，就千祈唔好等喇！
中村藤吉本店金鐘
地址：金鐘太古廣場110店 (AMC 戲院旁)
營業時間：星期一至日 上午10:30至晚上9:00
